Exodus 6

Genesis  «  Exodus 5  ‹  Exodus 6  ›  Exodus 7  »  Leviticus

Տէրը Մովսէսի ըսաւ. «Հիմա պիտի տեսնես ինչ որ պիտի ընեմ Փարաւոնի. որովհետեւ ուժեղ ձեռքով պիտի արձակէ զանոնք, եւ ուժեղ ձեռքով պիտի վռնտէ զանոնք իր երկրէն»։

ԱՍՏՈՒԱԾ ԿԸ ԿԱՆՉԷ ՄՈՎՍԷՍԸ

Աստուած Մովսէսի խօսեցաւ ու անոր ըսաւ. «Ե՛ս եմ ¹Եհովան։

Աբրահամի, Իսահակի եւ Յակոբի երեւցայ “Ամենակարող Աստուծոյ” անունով. բայց անոնց չճանչցուեցայ իմ “Եհովա” անունովս։

Նաեւ անոնց հետ հաստատեցի իմ ուխտս, որ անոնց տամ Քանանի երկիրը, անոնց գաղթականութեան երկիրը՝ ուր պանդխտացան։

Լսեցի նաեւ հեծեծանքը Իսրայէլի որդիներուն, որ Եգիպտացիները ստրուկ ըրին, եւ յիշեցի իմ ուխտս։

Ուստի ըսէ՛ Իսրայէլի որդիներուն. “Ե՛ս եմ Եհովան. ե՛ս պիտի հանեմ ձեզ Եգիպտացիներու բռնի աշխատանքներուն տակէն, պիտի ազատեմ ձեզ անոնց ստրկութենէն, ու պիտի փրկեմ ձեզ երկարած բազուկով եւ մեծ դատաստաններով։

Ձեզ պիտի առնեմ իբր ի՛մ ժողովուրդս. ձեզի Աստուած պիտի ըլլամ, ու պիտի գիտնաք թէ ձեզ Եգիպտացիներու բռնի աշխատանքներուն տակէն հանող Տէրը՝ ձեր Աստուածը՝ ե՛ս եմ։

Ձեզ պիտի տանիմ այն երկիրը՝ որուն համար ²երդում ըրի՝՝, որ Աբրահամի, Իսահակի եւ Յակոբի տամ, ու ձեզի պիտի տամ զայն՝ իբր ստացուածք։ Ե՛ս եմ Տէրը»։

Մովսէս ա՛յսպէս ըսաւ Իսրայէլի որդիներուն. բայց անոնք Մովսէսի մտիկ չըրին՝ հոգիի վհատութեան ու տաժանելի ստրկութեան պատճառով։

Տէրը խօսեցաւ Մովսէսի՝ ըսելով.

«Մտի՛ր Եգիպտոսի Փարաւոն թագաւորին քով, եւ խօսէ՛ որ Իսրայէլի որդիները արձակէ իր երկրէն»։

Իսկ Մովսէս խօսեցաւ Տէրոջ առջեւ՝ ըսելով. «Ահա՛ Իսրայէլի որդինե՛րը ինծի մտիկ չըրին, հապա ի՞նչպէս Փարաւոն ինծի մտիկ պիտի ընէ, ինծի՝ որ ³ծանրալեզու եմ»։

Տէրը խօսեցաւ Մովսէսի եւ Ահարոնի, ու պատուիրեց անոնց՝ որ Իսրայէլի որդիներուն ու Եգիպտոսի Փարաւոն թագաւորին երթան, որպէսզի Իսրայէլի որդիները Եգիպտոսի երկրէն դուրս հանեն։

ՄՈՎՍԷՍԻ ԵՒ ԱՀԱՐՈՆԻ ԱԶԳԱԲԱՆՈՒԹԻՒՆԸ

Ահա՛ւասիկ անոնց ⁴նահապետութիւններուն գլխաւորները։ Իսրայէլի անդրանիկին՝ Ռուբէնի որդիները.— Ենովք, Փաղղուս, Եսրոն եւ Քարմի. ասոնք են Ռուբէնի գերդաստանները։

Շմաւոնի որդիները՝ Յամուէլ, Յամին, Ոհադ, Յաքին, Սահառ, ու քանանացի կնոջ որդին՝ Սաւուղ. ասոնք են Շմաւոնի գերդաստանները։

Ահա՛ւասիկ Ղեւիի որդիներուն անունները՝ իրենց ծնունդներուն համեմատ.— Գերսոն, Կահաթ եւ Մերարի։ Ղեւիի կեանքին տարիները՝ հարիւր երեսունեօթը տարի եղան։

Գերսոնի որդիները՝ իրենց գերդաստաններուն համեմատ՝ Ղոբենի ու Սեմէի էին։

Կահաթի որդիները՝ Ամրամ, Իսահառ, Քեբրոն եւ Ոզիէլ. Կահաթի կեանքին տարիները հարիւր երեսուներեք տարի եղան։

Մերարիի որդիները՝ Մոհողի ու Մուսի։ Ղեւիի գերդաստանները՝ իրենց ծնունդներուն համեմատ՝ ասոնք են։

Ամրամ իր հօրաքոյրը՝ Յոքաբէդը իրեն կին առաւ, որ ծնաւ իրեն Ահարոնը եւ Մովսէսը. Ամրամի կեանքին տարիները հարիւր երեսունեօթը տարի եղան։

Իսահառի որդիները՝ Կորխ, Նափեկ ու Զեքրի։

Ոզիէլի որդիները՝ Միսայէլ, Եղիսափան եւ Սեթրի։

Ահարոն իրեն կին առաւ Ամինադաբի աղջիկը, Նաասոնի քոյրը՝ Եղիսաբէթը. ան ծնաւ իրեն Նադաբը, Աբիուդը, Եղիազարն ու Իթամարը։

Կորխի որդիները՝ Ասիր, Եղկանա եւ Աբիասափ. ասոնք են Կորխեաններուն գերդաստանները։

Ահարոնի որդին՝ Եղիազար Փուտիէլի աղջիկներէն իրեն կին առաւ. ան ծնաւ իրեն Փենեհէսը։ Ասոնք են Ղեւտացիներուն ⁵նահապետները՝ իրենց գերդաստաններուն համեմատ։

Ասոնք են այն Ահարոնը եւ Մովսէսը՝ որոնց Տէրը ըսաւ. «Իսրայէլի որդիները հանեցէ՛ք Եգիպտոսի երկրէն՝ իրենց զօրաբաժիններուն համեմատ»։

Իսրայէլի որդիները Եգիպտոսէն հանելու համար՝ Եգիպտոսի Փարաւոն թագաւորին խօսողները ասո՛նք են, այս Մովսէսն ու Ահարոնը։

ԱՍՏՈՒԾՈՅ ՀՐԱՄԱՆԸ ՄՈՎՍԷՍԻ ԵՒ ԱՀԱՐՈՆԻ

Այն օրը երբ Տէրը խօսեցաւ Մովսէսի՝ Եգիպտոսի երկրին մէջ,—

Տէրը խօսեցաւ Մովսէսի՝ ըսելով. «Ե՛ս եմ Եհովան. ամէն ինչ որ քեզի կ’ըսեմ, Եգիպտոսի Փարաւոն թագաւորին խօսէ՛»,—

Մովսէս Տէրոջ առջեւ ըսաւ. «Ահա՛ ես ⁶ծանրալեզու եմ, ուստի ի՞նչպէս Փարաւոն ինծի մտիկ պիտի ընէ»։